مسلسل رسالة_الإمام.. قررت الشركة المتحدة للخدمات الإعلامية طرحه في رمضان 2023.. واللي بيتناول سيرة الإمام الشافعي ثالث أئمة المذاهب الأربعة.. في أهم محطات حياته «مصر».. بيحقق نجاحات متواصلة يوم بعد يوم.. وطبعًا لأن مفيش نجاح بدون محاولات للإفشال .. في بعض الهبيدة واللجان وأهل الشر، دورهم في الحياة انهم يتصيدوا كل كبيرة وصغيرة علشان هدفهم ان الناجح يبقى فاشل.
بداية محاولات الإفشال كانت نضارة خالد النبوي وبعدها الكوباية الزجاجية ثم أشعار الإمام الشافعي.. الحقيقة ان رغم اثبات فشل متصيدي الأخطاء واللجان التابعة لأهل الشر واللي بتسعى طول الوقت لمحاولة هدم العمل التاريخي والديني الضخم اللي قدر في حلقاته الأولى إنه يظهر بشكل يليق بإسم مصر كواحدة من الدول الكبيرة في صناعة السينما والدراما.
الأخطاء واردة ورغم كل ده وجود «الأزهر الشريف» على تتر المسلسل بيعطي طمأنينة كبيرة لمتابعي العمل الدرامي .. لكن تصيد الأخطاء هدفه هدم أي عمل مش بس درامي حتى في حياتنا اليومية.. الشخص اللي بيتصيد لك الأخطاء في الشغل.. أو حتى في العلاقات بين الأصدقاء.. هو فرد كاره للنجاح او عنده مخطط لإفشال الناجح بأي طريقة.. الفرد ده ممكن يبقى مجموعة أو لجنة أو أي شيء.
ومع كل ده بيفشلوا والناس بترتبط بالعمل اكتر .. والمشاهدات بتزيد سواء على القنوات او حتى على السوشيال ميديا والمنصات المختلفة.. لأن المعادلة بسيطة ومفيهاش شك.. «طالما في جهد وناس تعبت ربنا مش بيضيع المجهود أبدًا مهما حصل».
تعليقات